PyiGyiKhin

၂၈-၀၃-၂၀၂၅ ရက်နေ့တွင် လှုပ်ခတ်ခဲ့သည့် အင်အားရစ်ချက်တာစကေး (၇.၇) ပမာဏရှိ အင်အားကြီး မြေငလျင်ကြောင့် မြန်မာနိုင်ငံအလယ်ပိုင်းဒေသများနှင့် ရှမ်းပြည်နယ် ဒေသအချို့တွင် နေထိုင်သည့် ပြည်သူများ ပြင်းထန်စွာထိခိုက်ခဲ့ရသည့်အတွက် ပြည်ကြီးခင်အသင်းအနေဖြင့် များစွာစိတ်ထိခိုက် ခံစားရပါသည်။
လက်ရှိအချိန်တွင် ထိခိုက်ပျက်စီးမှုပမာဏကြီးမားလှသည့်အတွက် ကူညီကယ်ဆယ်ရေးနှင့် ပြန်လည်ထူထောင်ရေးလုပ်ငန်းများအတွက် ငွေကြေးနှင့် အခြေခံလိုအပ်ချက်များစွာရှိနေပါသည်။
ပြည်ကြီးခင်အသင်းအနေဖြင့် ပျဉ်းမနား၊ ရွှေဘိုနှင့် မန္တလေးမြို့များရှိ စင်တာများမှ ဝန်ထမ်းများနှင့် စေတနာ့ဝန်ထမ်းများမှ ဒေသခံကျန်းမာရေးလုပ်ဆောင်နေသောအဖွဲ့များ၊ ပရဟိတအဖွဲ့များနှင့် ချိတ်ဆက်ပြီး ငလျင်ဘေးသင့်ရာဒေသများသို့ သွားရောက်၍ အကူအညီများပေးလျက်ရှိပါသည်။ အရေးပေါ် ကူညီကယ်ဆယ်ရေးအပြင် ငလျင်ဘေးသင့်ပြည်သူများအတွက် အရေးပေါ် လိုအပ်နေသည့် အစားအစာ၊ ရေသန့်နှင့် ဆေးဝါးများ အလျင်အမြန် ထောက်ပံ့ပေးနိုင်ရန်အတွက် ဦးစားပေး စီစဥ်ဆောင်ရွက်လျက်ရှိပါသည်။
ကချင်၊ ကရင်၊ မွန်၊ ရှမ်း၊ စစ်ကိုင်း၊ တနင်္သာရီ၊ မကွေး၊ မန္တလေး၊ ရန်ကုန်၊ နေပြည်တော် တို့ရှိ စင်တာ ၂၉ ခု မှ ဝန်ထမ်းများ ၊စေတနာ့ဝန်ထမ်းများဖြင့် အရေးပေါ်ဆေးကုသရေးအဖွဲ့များ ဖွဲ့စည်း၍ ငလျင်ဘေးသင့်ရာဒေသများတွင် အခြေခံကျန်းမာရေးစောင့်ရှောက်မှုများကို ဆောင်ရွက်ပေးသွားမည်ဖြစ်ပါသည်။
အသင်းမှ လုပ်ဖော်ကိုင်ဖက်ဝန်ထမ်းများသည် ၂၀၁၆ခုနှစ်မှ စတင်၍ လစဥ်လုပ်အားခ၏ (၁) ရာခိုင်နှုန်းကိုစုဆောင်းခဲ့ကြပြီး သဘာဝဘေးကြုံတွေ့သည့်အခြေအနေနှင့် နှစ်စဉ်ကျောင်းစရိတ်လိုအပ်သော ကလေးများအား ပံ့ပိုးခြင်းတို့ကိုလုပ်ဆောင်လျက်ရှိပါသည်။ ပြည်ကြီးခင်အသင်းအနေဖြင့် ယင်းဝန်ထမ်းများ လစဉ်စုဆောင်းငွေမှ သိန်း ၅၀၀ ကျပ်တိတိကို ကနဦး ‘မ’တည်ငွေအဖြစ် လှူဒါန်းထည့်ဝင်မည်ဖြစ်ပါသည်။
အနယ်နယ်အရပ်ရပ်တွင်နေထိုင်ကြသည့် ပြည်တွင်း၊ ပြည်ပမှ မိတ်ဆွေများကိုလည်း ပြည်ကြီးခင် အသင်းနှင့်အတူ အနည်းအများမဆို ထည့်ဝင်လှူဒါန်းနိုင်ရန် ဖိတ်ခေါ်အပ်ပါသည်။